SIRA

Kak Ramlah : Bang, neu kaloen si Nyak siat beh. Lon jak rumoh Cut Ni siat jak bayeu peng julo-julo.

Apa Maun : Teuma nyoe lon teungoh nonton Bola, kiban?

Kak Ramlah : Halaaaaahai bang meutuah...! Sira nonton Bola peu hanjeut neu kalon aneuk dilikeu mata? Sang na rumoh ubee geulanteu, hantroeh Jaga aneuk lam jangkauan mata.

Apa Maun : Tengoh hayeu hai... Pane na jeut ta kalon sigoe saho.

(Mata hana meu klep dari Tv, Jaro hana piyoh bak puliek kulet kacang, abah pih hana piyoh meujungkat seumajoh )

Kak Ramlah : That gura droen! Lon ka hek seumerah, seumeupel, meugosok.

Meu sira nonton bola hanjeut kalon sigoe saho. Lon sira magun, sira tingku aneuk, sira balah WA.

Kadang sira roen abee, leuh peuget PR aneuk mit, leuh ngoen nonton film India

Droen sira DUK mentoeng; nonton TV, meu Aneuk hanjeut neu keumit.

Apa Maun : Hai wakdroen keun laen, awak inong Multitasking; MultiSira.

Sira neupeubut nyoe jeut neupeubut jeh, kamo awak agam hanjeut le that seumeubut lam saboh watee.

Kak Ramlah : cit le that alasan bak droen, inti jih peu? Han ek neu jaga?

Apa Maun : Koen han ek hai, lon hana fokus... Enteuk sira khusyuk kaloen bola rap di loep lam gawang, ka hana teukalon siNyak pih rap di loep lam umpung manok.

Nyoe droen laen, sira neu jak rumoh Cut Ni jeut neu tingku laju siat.

Keun droen makkhluk Sira, lon hana galak but Sira-Sira. Lon galak yang mameh lage Saka-Saka.

(Leuh nyan geu klep mata teukhem tanpa rasa salah, pakek geupeutaba lom kacang tanoh ngeun isyarat jaroe ngen mata)

Kak Ramlah : O, kajeut meunan nyoe hanjeut meusira-sira. asal bek menyesal mentoeng ngen narit droe.

( Tekejot teuk Apa Maun siat, rap tuwo na perumoh "meu-akay". Tapi sebab that galak ke permainan Cek Do, kakeuh hana sempat peureumeun le. Hana meu geu kalon le pih Peurumoh ngen Aneuk ho ka. Ban teuingat oh leuh habeh Bola, watee rap jeut bajoh bu leuho)

Apa Maun : Hoe neujak trep that neu wo? Rumoh Cut Ni ken 3 meunet sagay dari pageu? Nyoe ka rap 2 jeum lewat ban troh rumoh.

Kak Ramlah : Hai lage droen peugah buno. Kamo keun makhluk Sira. Sira jak rumoh Cut Ni peutroh laju u Bakso Bang Him bacut teuk. Geunanto bajoh bu cot uro

Apa Maun : Pane na bacut teuk, rap 300 mete. Pane peng neu cok ka akhee buleun bajoh bakso? Meu lon yang mita peng tinggay 5000 teuk didompet.

Kak Ramlah : Oh droen, Hana neu tuoh makhluk Sira

Sira ta rhah baje lako keun ta lhuek le lam keh, peu na tinggay peng tuwo droen amankan.

Kiban rezeki lon goe nyoe, peng biru loem.

Apa Maun : Astaghfirullah... Patot keuh bagah that abeh peng buleun nyoe. (ka geupeh talak droe teuh)

Kak Ramlah : Rezeki Perumoh Sira bang, bek lage droen hanjeut Sira-Sira. (ka geu sebeng poni)

Apa Maun : ......

Sayang that nasib lon,

Peng abeh uroe nyoe.

Ta nonton Bola talo.

Bu pih gohlom meupat ka leuho..

Ka keuh, neutagun engkot-engkot dile. That deuk ka (ka geu raba prut yang sama meupunyoe lage rupa muka)

Kak Ramlah : Nyan keun na bu dimiyup tutop raga?

Apa Maun : Man bu tok ku pajoeh? Hana kuah ngen eungkoet?

Kak Ramlah : Hai keun "hanjeut Sira" neu peugah?

Pane na jeut sira neupajoh bu sira pajoh eungkoet?

Neu pajoh bu mentoeng dilee.

Singoh lon tagun kuwah, Lusa lon tagun eungkoet. 😏